LUR vir finansies in bedrogsaak moet in sel bly
2010-11-06 08:17
Kimberley. – Twee regters het die aansoek van John Block (43), Noord-Kaapse ANC-voorsitter en LUR vir finansies, ekonomie en toerisme om ’n landdros se uitspraak oor die datum van sy borgtogaansoek te hersien, gistermiddag van die hand gewys.
Dit beteken dat hy minstens tot Dinsdag in ’n enkelsel by ’n polisiekantoor aangehou sal word. Die staat sal dan besluit of sy aansoek om borgtog teengestaan gaan word.
Block, Gaston Savoi, voorsitter van Intaka Investments, en sewe medebeskuldigdes is vroeër vandeesweek in verband met bedrog, korrupsie en geldwassery van meer as R40 miljoen in hegtenis geneem.
Die misdrywe is na bewering in 2005 gepleeg.
Landdros Lance Raoch het eergisteraand beveel Block en Savoi, ’n skatryk sakeman van Uruguay, moet op versoek van die staat sewe dae lank aangehou word.
Dit is die tyd wat die staat benodig om te besluit of hy die borgtog wil teenstaan.
Terselfdertyd het Raoch borgtog aan die sewe medebeskuldigdes toegestaan.
Enkele ure ná die landdros se uitspraak het Block se regsverteenwoordiger ’n dringende aansoek by die hooggeregshof ingedien dat die landdros se beslissing hersien moet word.
Regter S.A. Majiedt het die verrigtinge gister kort ná middernag onbepaald uitgestel sodat die oorkonde van die landdroshofverrigtinge getik kon word.
Die getikte oorkonde was gister om 15:45 gereed. Block was nie in die hooggeregshof nie.
Regter Majiedt, bygestaan deur regter C.J. Olivier, het gesê al slaag Block met die hersieningsaansoek, kan die hooggeregshof nie oor ’n borgtogaansoek beslis nie, want dit is magte wat die wet aan ’n landdros toegedeel het.
Die regter het verder daarop gewys dat adv. Menzi Simelane, nasionale direkteur van openbare vervolging, die aanklaer, verskeie kere in die getikte oorkonde na die belange van geregtigheid verwys het.
Volgens Simelane moet Block aangehou word weens nog ongerymdhede wat in die ondersoek geopenbaar kan word en omdat Block vanweë sy magsposisie met staatsgetuies kan inmeng.
- Beeld