'LUR sou vir moorde betaal'
2011-02-15 07:08
Virginia - ’n Selferkende moordenaar en eens gevreesde bendeleier wat genader is om sluipmoorde op ’n bekroonde polisieman van Welkom en ’n boer van Wesselsbron uit te voer, het hier in die hooggeregshof getuig ’n Vrystaatse LUR sou die geld vir dié moorde voorsien.
Luidens getuienis sou Dan Khotule, Vrystaatse LUR vir sport, kuns, kultuur en ontspanning, die geld vir die moorde aan sy broer, sers. Japhta Khotule, voorsien. Laasgenoemde is een van die beskuldigdes wat op verskeie aanklagte hier teregstaan.
Andries Louw het ook getuig dat lt.kol. Abe Kolisang, bevelvoerder van die eenheid teen georganiseerde misdaad, deel van die moordkomplot was. Dit is hy wat voorgestel het dat van ao. Nico Smith ontslae geraak moes word, “omdat hy te diep krap”.
’n Nuwe ondersoekbeampte sou geen probleem wees nie, omdat Kolisang hom gou sou “uitsort”.
Louw het getuig Kolisang was volgens ao. Donnie Williams van Welkom, wat hom met die “werksaanbod” genader het, in die sak van ’n groep polisiemanne wat van onder meer die roof op Carel Marais van Wesselsbron en sameswering tot sy en Smith se moord aangekla word.
Volgens Louw se getuienis het die groep Kolisang van geld vir sy “dwelmgewoonte” voorsien. (Volgens Louw se beëdigde verklaring was dit kokaïen wat Kolisang gereeld gebruik het.)
Hy het voor regter Faan Hancke getuig dat die R10 000, wat hom vir die moorde aangebied is, te min was – hy wou R50 000 per kop hê.
Ene Blompot, ’n vriend wat hom ook met die werk genader het, het gesê dit is geen probleem nie, want sers. Japhta Khotule se broer is ’n LUR en hy is bereid om die geld te voorsien. Khotule is die broer van Dan Khotule, Vrystaatse LUR vir sport, kuns, kultuur en ontspanning.
Louw, wat in die getuiebeskermingsprogram is, is Maandag by die hof op Virginia deur drie gewapende mans bewaak en kon geen beweging maak sonder dat hulle aan sy sy was nie.
Hy het op ’n vraag van regter Hancke getuig hy was vroeër ’n gevreesde bendeleier vir wie selfs die polisie bang was. “As ek iemand doodgemaak het, was dit nie net twee of drie meshoue nie. Ek het op hom geklim en aanhou steek totdat ek seker was hy sou nie weer opstaan nie.”
Hy het sy wreedaardige geaardheid afgeskud toe hy sy vrou ontmoet het. Sy en haar godsdienstige familie het sy lewe verander.
Hy het getuig dat hy reeds deur Williams na Smith se huis geneem is om te wys waar hy bly. Williams het hom aangesê om ná die moord op Smith oornag by die “bruin hoekhuis” van ’n polisiekaptein in dieselfde straat te gaan skuil.
Omdat hy Smith goed ken en nie meer “die tipe werk” gedoen het nie, het hy die aanbod van die hand gewys en is daarna verskeie kere deur ’n woedende Williams en sy bende aangerand. Sy huis is met klippe verwoes en twee van sy motors is uitgebrand.
Die beskuldigdes is Molehane Mabuza van Wesselsbron, Faan Rossouw (werklose en voormalige polisie-informant van Welkom), Andrew Scheepers (begrafnisondernemer van Christiana), Barney Booysen (werklose van Christiana), ao. Xolisile Blom, ao. Jabulane Xaba, Khotule, ao. Steven Mthwalo, Sechaba Masiane en ao. Sello Mtsala.
Hulle ontken almal skuld op aanklagte van menseroof, diefstal, gewapende roof, sameswering tot moord, dat hulle hulle voorgedoen het as polisiebeamptes, en van die gebruik van ’n voertuig sonder toestemming.
Ao. Mthwalo, wat op borgtog is, is Vrydag op aanklagte van besit van goudstof in hegtenis geneem.
- Vrystaat