LUR het plan vir huise in Vrystaat
2011-01-14 10:23
Bloemfontein - ’n Nuwe stelsel om bekostigbare huise aan middelklas-broodwinners te verskaf kan binnekort in die Vrystaat begin.
Mosebenzi Zwane, Vrystaatse LUR vir samewerkende regering, tradisionele sake en landelike ontwikkeling, het Donderdag in ’n onderhoud sy plan met ’n nuwe soort laekostebehuising aan Volksblad bekend gemaak.
Hy sê daar bestaan ’n groot behoefte by mense wat ’n goeie werk het, maar steeds nie genoeg verdien om goeie huislening by ’n bank te kry nie, om ’n huis te bekom.
Dit is mense wat meer as R3500 ’n maand verdien en dus nie kwalifiseer vir ’n HOP-huis van die regering nie.
“Ek was self jare gelede ’n onderwyser en ek het baie begrip vir onderwysers en ander mense wat hard werk, maar nie werklik ’n goeie salaris ontvang nie.”
Daarom voer dié departement samesprekings met die nasionale departement en verskeie belanghebbendes vir ’n oplossing hiervoor.
Zwane sê die idee is dat dié departement vir mense, soos onderwysers en polisielede, wat dit andersins nie kan bekostig nie, nuwe huise help bou.
Die huise se pryse sal by sowat R72 000 ’n huis begin.
Die idee is dat mense die huis dan renteloos terugbetaal teen ’n bedrag van sowat R850 per maand.
“Sódoende kan iemand ’n splinternuwe huis binne sewe en ’n half jaar afbetaal,” sê hy.
Die prys van die huis kan hoër ook wees en sal deur ’n persoon se inkomste bepaal word.
Zwane sê dit is vir hom pynlik dat eerlike broodwinners hulle jare lank afsloof, maar nooit kwalifiseer om ’n huis te koop nie.
Die projek kan reeds in Maart vanjaar begin en is volgens Zwane ’n eerste in die land.
“Daar is reeds 250 mense op Wesselsbron geïdentifiseer.
“Dinge kan binnekort begin gebeur.”
- Volksblad