LP’s se sakke bult danksy hul reis-eise
2010-09-03 06:22
Die Burger
Kaapstad - ’n Tweede reisskandaal waar parlementslede in die laaste boekjaar meer as R6 miljoen in hul sakke gesteek het, is Donderdag onthul.
In een geval het ’n enkele LP sy jaarlikse inkomste met byna R300 000 aangevul.
Patricia de Lille, OD-leier, het op ’n nuuskonferensie in die parlement ses oortreders geïdentifiseer.
Volgens die nuwe modus operandi verkies LP’s eerder om per motor te reis, pleks daarvan om te vlieg. Die kilometers word dan ten duurste teruggeëis.
In die laaste boekjaar moes die parlement meer as R6miljoen opdok vir padreis-eise.
Dr. Manie van Dyk, DA-woordvoerder oor openbare ondernemings, het meer as R275 500 geëis toe hy per motor tussen sy kiesafdeling in Pretoria en die parlement gereis het.
Dit het ’n bykomende maandeliks inkomste van byna R23 000 vir Van Dyk beteken.
Ebrahim Sulliman, ANC-LP, het R242 000 geëis en De Lille se eie kollega, Jan Gunda, OD-LP van die Noord-Kaap, R134 000.
Eise word glo direk by die parlement ingedien, ’n proses wat De Lille wil hê moet verander.
Nadat De Lille verlede jaar van Gunda se salarisaanvulling uitgevind het, het sy dié LP se direkte eise onmiddellik stopgesit. Alle eise moet nou deur die partyleier goedgekeur word.
Van Dyk het by navraag gesê hy sal reageer as hy ’n skrywe van die parlement kry, omdat dit “hier oor die parlement gaan”. Hy hou vol dat hy binne die wet opgetree het.
Ian Davidson, DA-hoofsweep, het gesê hy het onmiddellik ’n verduideliking van Van Dyk geëis omdat die bedrag “abnormaal hoog” is.
“Sy eerste verduideliking was dat daar niks met die eise verkeerd is nie.”
Die DA sien egter die kwessie in ’n baie ernstige lig. Davidson het dit na die party se federale regskommissie verwys, wat ook na “etiese aspekte” sal kyk.
Sulliman het gesê daar is daagliks net een vlug tussen Kimberley en die Moederstad. “As ek die vlug verpas of nie ’n sitplek op die vlug kry nie, word ek gedwing om per motor te reis.”
Hy sou eerder verkies om te vlieg omdat hy “eintlik verloor omdat brandstofkostes, ’n mens se tyd en belasting meer kos as wat jy uitkry”.
Vir ’n rit padlangs tussen Kaapstad en Johannesburg mag LP’s ’n eis van byna R12 000 indien. Dít terwyl ’n retoerkaartjie die parlement tussen R5 000 en R6 000 kos.
Die handboek vir lede bepaal dat LP’s mag kies tussen ’n lug-, pad- of treinreis. Die parlement vergoed hulle net vir die laaste twee.
Volg Nuus24 op Twitter
- Die Burger