LP’s doen glad nie sleg nie
2009-08-29 07:39
Kaapstad - Cope-LP’s is inderdaad welgesteld. Dit is te oordeel na die register waarin parlementariërs hul belange in maatskappye, die besit van eiendom en die geskenke wat hulle ontvang het, verklaar.
Thozamile Botha, Cope-LP, het ’n besonder benydenswaardige eiendomsportefeulje.
Sy bates bestaan onder meer uit twee plase (een in die Baviaanskloof in die Oos-Kaap en een naby die Hartbeespoortdam in Noordwes), ’n boothuis, verskeie leë erwe, woonstelle én vyf kommersiële geboue.
Botha, ’n vermoënde sakeman en voormalige direkteur-generaal van die Oos-Kaap, is ook direksielid van 58 private maatskappye, nege beslote korporasies en drie openbare maatskappye.
Philip Dexter, nog ’n Cope-LP en die party se woordvoerder, is direksielid van 29 private maatskappye en drie beslote korporasies.
Wat kabinetsministers betref, besit dr. Nkosazana Dlamini-Zuma (binnelandse sake), ’n erf in die gesogte Zimbali-kusoord, noord van Durban.
Tina Joemat-Pettersson (landbou, bosbou en visserye) spog met twee eiendomme in Stockholm, Swede – ’n woonstel en ’n somerhuis.
Eerw. Musa Zondi, IVP-LP, dien in die direksie van 14 maatskappye en besit drie eiendomme in Ulundi, KwaZulu-Natal.
Onder die welgestelde ANC-LP’s tel Thaba Mufamadi, wat spog met ’n wildplaas in Limpopo, twee wonings in Lynnwood, Pretoria, en ’n erf van 4 ha in Midrand. Hy is boonop ’n direksielid van 16 private maatskappye.
Patti Duncan, DA-LP, hoef nie terug te staan wat haar eiendomsportefeulje betref nie. Sy het verskeie eiendomme in Langebaan aan die Weskus – onder meer vyf huise en vier erwe. Haar partygenoot Mike Waters besit grond in Australië.
Tokyo Sexwale, tans minister van huisvesting en gewese sakeman, het uit die direksies van verskeie maatskappye bedank.
- Die Burger