Krugerpark sal afgetrede wildbewaarders gebruik

2012-02-07 19:08

Johannesburg – Afgetrede wildbewaarders sal vir stakende wildbewaarders instaan by die Kruger Nasionale Park (KNP), het die park Maandag gesê.

Woordvoerder William Mabasa sê die park word tydelik bygestaan deur die Suid-Afrikaanse polisiediens en die Suid-Afrikaanse Nasionale Weermag.

Die park het nou begin om afgetrede werknemers en ander opgeleide wildbewaarders te nader om tydens die staking te werk.

Hy het bygevoeg dat die park nie beplan om die stakende werkers af te dank nie. Die werkers word nie deur ‘n vakbond verteenwoordig nie.

Werkers vereis gelyke salarisse reg oor die bank. Hulle glo werknemers in soortgelyke posisies moet gelyke salarisse verdien, ongeag van opleiding en die hoeveelheid jare se ervaring wat hulle opgedoen het.

“Jy kan nie gelyke salarisse hê nie... daar sal ‘n verskeidenheid wees,” het Mabasa gesê.

Hy sê die toerismesektor van die park word nie deur die staking geraak nie en sake gaan aan soos voorheen.

“Die toeriste word nie geraak nie en ons waardeer dat die stakende werkers nie enigiemand geïntimideer het nie, maar ons is bekommerd oor die renosterstropery,” het hy gesê.

Mabase het ook gesê dat daar geen voorvalle van renosterstropery was sedert die staking op 3 Februarie afgeskop het nie.

– Volg Nuus24 op Twitter
 

- SAPA