‘Krokodil!’ – toe verdwyn vrou
2010-01-04 08:12
Marietie Louw-Carstens
Johannesburg - ’n Groep vriende van Phalaborwa in Limpopo se Nuwejaarsdagpret het in ’n tragedie geëindig toe ’n krokodil ’n jong vrou in die Olifantsrivier gegryp en vermoedelik verslind het.
Mariska Buitendag (27), ’n kelnerin van Phalaborwa, het volgens vriende nie eens tyd gehad om om hulp te roep of te gil nie. Sy het ook nie gespartel nie.
Slegs ’n rimpeling op die water is gesien waar sy sekondes tevore in die Olifantsrivier geswem het.
Pieter (Borris) Henning, haar vriend, het gesê een van hul vriende het net gegil “die krokodil!”
Henning wat op die wal van die rivier was, het dadelik in die water gespring om na Buitendag te soek.
“Alles het hopeloos te vinnig gebeur. Ek was te laat. Sy was weg,” het hy gesê. Henning en Buitendag was slegs sowat ’n week lank ’n paartjie.
Buitendag en ’n groep vriende het Vrydagoggend na die walle van die Olifantsrivier buite Phalaborwa gegaan om Nuwejaarsdag te vier.
Volgens Henning was hulle naby Kambako River Safaris, waar safari’s op bote vir toeriste aangebied word. “Ons het al baie daar gaan ontspan en lekker rustig gekuier.”
Buitendag het die oggend glo twee keer in die Olifantsrivier gespring en geswem. Dit is toe sy glo die derde keer ingespring en op haar rug geswem het, dat die krokodil haar gegryp het.
Beeld het by ’n polisielid, wat kort ná die voorval by die rivier opgedaag het, verneem sy was tussen 10 en 15m van die rivierwal af toe die krokodil haar gevang het.
Sers. Malesela Makgapo, woordvoerder van die Phalaborwa-polisie, het gesê die groep vriende het glo baie drank gebruik.
“Swem word ten strengste verbied op die plek waar die vriende die dag geswem het,” het Makgapo gesê.
Die polisie van Polokwane (Pietersburg) se watervleuel is Saterdag na die plek om na Buitendag te soek.
’n Polisiesnuffelhond is ook langs die walle van die rivier ingespan om na haar oorskot te soek.
Makgapo het gesê die polisie maan mense om nie in riviere in Limpopo te swem nie. ’n Jare lange inwoner van Phalaborwa het aan Beeld gesê “ ’n mens druk nie eers jou toon in daai rivier nie. Dit is vrot van die krokodille en seekoeie.”
Buitendag het by ’n restaurant in die dorp gewerk. Sy het twee jong kinders. Haar ouers was in Pretoria tydens die voorval en het hulle na Phalaborwa teruggehaas nadat die polisie hulle gebel het.
Karel Buitendag, haar pa, wou nie met Beeld praat nie.
- Beeld