Krokodil gryp seun by rivier
2011-03-29 07:17
Johannesburg – ’n Tienerseun is Saterdag deur ’n krokodil gevang toe hy water in ’n rivier in die Vhembe-streek van Limpopo gaan haal het.
Mpho Bwoy Mugwena (12) het saam met vriende na die Mutshindunirivier, sowat 40 km noordoos van Thohoyandou, gegaan om drinkwater te gaan haal.
Kapt. Mashudu Malelo, polisiewoordvoerder, het gesê sy geskokte vriende het gesien hoe die krokodil hom gryp en in die water verdwyn.
Hulle het na die Tshivhilwi-nedersetting, waar die seun gebly het, gehardloop om hulp te kry.
Die gemeenskap het die polisie in kennis gestel.
Die gemeenskap is woedend omdat die polisie glo nie dadelik na die rivier gegaan het om na die seun te soek nie. Volgens van die mense het plaaslike polisielede glo gesê hulle is “te bang” om in die rivier in te gaan omdat daar baie krokodille is.
Die polisie moes Maandagoggend ingryp toe van die mense gedreig het om self na die seun of oorskot van hom in die rivier te soek. Volgens Malelo moes polisielede gisteroggend die gemeenskap probeer kalmeer.
Na verneem word, het ’n groep van sowat 15 mense omstreeks 12:00 die rivier met stokke ingegaan om die krokodille weg te jaag.
Lt.kol. Mohale Ramatseba, provinsiale polisiewoordvoerder, het gesê die polisie en polisieduikers is Saterdag na die rivier. Dit was glo te gevaarlik om met ’n reddingsoperasie te begin omdat die rivier vol krokodille is.
“Die polisie is altyd bereid om hul lewe te waag in gevaarlike reddingsoperasies, maar sommige situasies soos ’n rivier vol krokodille maak dit onmoontlik vir die polisie om in te gryp,” het Ramatseba gesê.
Hy het gesê die polisieduikers is gister weer na die rivier om na oorskot van die seun te soek.
“Mense moenie water gaan haal in riviere waar krokodille is nie. Hulle moet ook nie daar swem of speel nie,” het Ramatseba gesê.
Volg Nuus24 op Twitter
- Beeld