'Kriminele elemente' in die ANC, meen Ace
2012-07-31 15:32
Bloemfontein – Daar is kriminele elemente in die ANC, het die party se leier in die Vrystaat, Ace Magashule, Dinsdag gesê.
Hy het gereageer op vrae oor gewelddadige diensleweringsbetogings in sommige Vrystaat-munisipaliteite.
Magashule, wat ook die Vrystaat se premier is, sê daar is aanduidings deur die polisie en sommige strukture in die party dat die betogings verbind word met ANC-politiek voor die party se nasionale verkiesingskonferensie in Mangaung in Desember.
“Die waarheid sal met tyd uitkom,” het Mashule in gesprekke met The New Age-koerant gesê.
Gewelddadige betogings oor dienslewering het sedert Februarie in Reddersburg, Marquard, Harrismith, Zastron, Edenburg, Vredefort, Petrusburg en Botshabelo plaasgevind.
Infrastruktuur is beskadig en in sommige gevalle is winkels wat deur buitelanders besit is geplunder, aan die brand gesteek en vernietig. Die eienaars moes vlug en veilige akkommodasie op ander plekke soek.
Rakende die party se sogenaamde faksiegevegte binne die ANC het Magashule gesê die party se leiers moet “op ‘n sekere manier optree” en geduldig wees.
Hy sê dissipline en respek is nie aspekte wat ‘n politieke party sy lede kan leer nie.
“Dit is iets wat jy as ‘n persoon by plekke soos jou huis sal leer – respek vir ouer mense moet ‘n gegewe wees.”
Magashule sê ‘n ANC-leier wat nog nie dissipline en respek geleer het nie het waarskynlik nog nie deur die proses van leierskap gegaan nie en is dalk nog nie gereed om te lei nie.
– Volg Nuus24 op Twitter
- SAPA
