Krejcir móés glo uit Tsjeggië vlug
2011-04-07 14:07
Johannesburg – Die Tsjeggiese sakeman Radovan Krejcir se advokaat het Donderdag 'n beëdigde verklaring oor hoekom hy in Suid-Afrika opgeëindig het, uitgelees.
Krejcir het in die Johannesburgse landdroshof verskyn op aanklagte van bedrog wat verband hou met 'n versekeringseis van R4,5 miljoen waarin hy mediese dokumente bekom het wat sê hy het kanker.
In sy beëdigde verklaring het Krejcir gesê hy moes die Tsjeggiese Republiek verlaat omdat sy lewe in gevaar was.
Krejcir het gesê hy het in 'n Tsjeggiese koerant oor sy inhegtenisneming gelees, berig Eyewitness News.
Hy ontken bewerings van bedrog.
Hy het ook beskryf hoe hy vervolging in die Tsjeggiese Republiek vrygespring het deur 'n beëdigde verklaring van sy uitleweringsverhoor in 2007 te gebruik. In dié verklaring het hy beweer dat hy deur die regering vervolg is en genoop is om vervalste paspoorte te gebruik om uit die land te vlug.
Krejcir het gepraat oor klopjagte wat 20 gewapende polisiemanne op sy huis uitgevoer het, hoe hy in die berge weggekruip en 'n fiets gebruik het om na Pole te ry.
Sy tog het hom toe deur Turkye, Doebai, die Seychelle en Madagaskar geneem voor hy in Johannesburg in hegtenis geneem is.
Sy vrou, Katerina, sy seun, Dennis, en sy ma, Nadezda, was in die hof.
Krejcir, geklee in 'n grys potloodstreep pak, het verskeie kere omgedraai en vir sy familie geglimlag terwyl sy regsverteenwoordiger sy verklaring gelees het.
Daar was 'n sterk polisieteenwoordigheid buite hof 16 voor Krejcir se verskyning.
Riegal Du Toit, staatsaanklaer, het met vier polisiemanne wat met R5-gewapen was, by die hof aangekom.
Dit is deel van 24-uur beskerming nadat sy naam op 'n moordlys, wat verlede week tydens 'n klopjag op Krejcir se huis uitgevoer is, verskyn het.
Cyril Beeka, ’n leiersfiguur in die onderwêreld wat sowat twee weke gelede in Kaapstad doodgeskiet is, en die privaat ondersoeker Paul O’Sullivan se name is ook op dié moordlys.
Krejcir word ook ondervra oor die moord op Beeka.
Beeka se naam was eerste op die moordlys wat in Krejcir se huis in Bedfordview gevind is.
Hofverrigtinge duur voort.
Volg Nuus24 op Twitter
- SAPA