Kotzé se medebeskuldigde vasgetrek
2012-01-11 10:49
Johannesburg – ‘n Man is in hegtenis geneem in verband met die grusame aanval op ‘n vrou van Modimolle (Nylstroom), het die polisie in Limpopo bevestig.
Brig. Hangwani Mulaudzi sê die 42-jarige man is Woensdagoggend in Makapanstad naby Hammankraal, noord van Pretoria aangekeer, het Sapa berig.
Die verdagte is een van die drie mans wat gesoek word vir die aanval op Johan Kotzé (50) se vervreemde vrou.
Kotzé, 'n voortvlugtige sakeman, het drie mans glo met ‘n vuurwapen gedwing om die vrou te verkrag.
Die vermeende verkragter se inhegtenisname kom nadat die polisie in Limpopo die drie mans, wat glo gehuur is om die vrou te verkrag, gevra het om na vore te kom om met die ondersoek te help.
Mulaudzi het gesê die drie mans was ook slagoffers van ’n misdaad, het Beeld Woensdag berig.
“Die verdagte sal na verwagting Vrydag voor die Modimolle-landdroshof verskyn...” het Mulaudzi gesê.
Hy sê die polisie het Dinsdagaand Kotzé se Toyota Fortuner in Modimolle gevind.
Kotzé het ná die aanval op sy vrou gevlug. Hy het glo Conrad Bonnette (19), sy stiefseun, doodgeskiet.
Volg Nuus24 op Twitter