'Kotzé sál weer moor'
2012-01-10 07:06
Bloemfontein – Johan Kotzé, die voortvlugtige Bloemfonteiner wat na bewering ’n vrou deur werkers laat verkrag en sy stiefseun koelbloedig vermoor het, is ’n “vyfster-psigopaat wat weer sal moor”.
Een van die land se bekendste forensiese sielkundiges, wat spesialiseer in ernstige geweldsmisdaad en al met verskeie reeksmoordenaars te doen gehad het, het aan Volksblad gesê Kotzé maak hom bang.
Dit is die eerste keer in dié forensiese sielkundige se loopbaan dat hy verkies om anoniem te bly uit vrees vir ’n psigopaat.
Kotzé besit volgens sy identiteitsdokument ’n .375-pistool, asook ’n .22-geweer en -handwapen.
Dié sielkundige sê as die bewerings teen dié voortvlugtige boer van Bloemfontein waar is, is hy ’n “evil, boosaardige” mens wat “uiters en selfs dodelik gevaarlik is”.
Twee vroue wat vroeër met hom in verhoudings was, het Kotzé ook Maandag in onderhoude met Volksblad as ’n baie intelligente, aggressiewe en dominerende mens beskryf wat ander verkleineer.
“Hy is ’n uitstekende manipuleerder,” sê een van die vroue.
Kotzé het na bewering nie geskroom om sy plaaswerkers te klap nie en in een geval selfs ’n hond beveel om ’n werker te bestorm.
“Hy het gemaak dat ek my hare sny voordat ons vir ’n naweek saam met sy vriende weggegaan het,” sê een van die vroue.
Die ander een sê hy het woedend geword as hy nie sy sin gekry het nie.
Nie een van hulle is deur hom aangerand nie, maar sê Kotzé het hulle sielkundig afgekraak en op hulle gevloek en geskel. Hy was aan albei ook duisende rande verskuldig en die vroue het lank gesukkel om hul geld uit hom te kry.
Die sielkundige het ook gesê weens Kotzé se beweerde ernstige patologie is hy daartoe in staat om ’n mens se huis binne te kom en jou dood te skiet.
Volgens hom is dit gevaarlik om iemand te diagnoseer sonder om hom te ondersoek, maar alles dui daarop dat “ons hier met ’n vyfster-psigopaat te make het”.
’n Psigopaat het ’n gebrekkige of geen gewete nie en is ’n meester-manipuleerder.
Die mens met wie die psigopaat in ’n verhouding is, is “soos ’n vlieg in ’n spinnekop se web”.
Indien bewerings waar is dat Kotzé deur vriende weggesteek word, is dit ’n bewys van sy uitsonderlike manipulerende vermoëns.
“Dié mense weet hulle kan in groot moeilikheid kom as hulle uitgevang word.”
Die sielkundige sê Kotzé ontken waarskynlik die bewerings teen hom en maak asof hy die slagoffer is.
Volgens Kotzé se beweerde optrede en beskrywings deur kennisse, sê die sielkundige hy voldoen aan die kriteria vir ’n manipulerende en sadistiese psigopaat.
Laasgenoemde word as ’n uiters gevaarlike mens beskou wat “inherent boos is”.
“Só iemand kry sterk emosionele en baie dikwels seksuele bevrediging deur ander te verneder, te martel en selfs te vermoor.”
Die sielkundige afbreking van vroue dui op ’n vorm van sadisme.
Die sielkundige sê as die bewerings teen Kotzé waar is, sal hy “sonder twyfel” weer moor.
– Volg Nuus24 op Twitter
- Volksblad