Kotzé erken hy het stiefseun geskiet
2012-11-22 17:45
Pretoria – Die sogenaamde Modimolle-monster, Johan Kotzé, het erken dat hy sy stiefseun doodgeskiet het, maar beweer hy het nie na hom gemik nie, en "dat 'n skoot afgegaan het".
Dít was die weergawe wat Donderdag in die Pretoriase hooggeregshof deur Bernard Bantjes, Kotzé se regsverteenwoordiger, aan sy eksvrou, Ina Bonnette, gestel is.
Kotze, Andries Sithole, Pieta Mohlane en Frans Mphaka word daarvan beskuldig dat hulle op 3 Januarie Bonnette se 19-jarige seun, Conrad, vermoor en haar ontvoer, herhaaldelik verkrag, aangerand en probeer het om haar te vermoor.
Bonnette het Kotzé se bewerings ontken dat dit haar idee was om haar seun na die huis te laat kom, en dat sy die nommer op haar selfoon aan Kotzé gewys het. Volgens Kotzé het hy aan Conrad gesê sy ma wil hê hy moet na die huis kom.
Bantjes het gesê volgens Kotzé kan hy nie alles goed onthou nie, maar hy kan onthou dat hy langs Bonnette aan die slaap geraak het. Kotzé beweer verder hy het Conrad buite die huis gesien kort nadat Bonnette hom wakker gemaak het omdat daar 'n klop aan die deur was.
Terwyl hy by die venster uitgeloer het, het hy "gevoel daar was 'n geweer".
Kotzé se weergawe is dat Conrad wou weet waar sy ma is en dat hy (Kotzé) die geweer opgetel het voor hy agter die tiener in die gang afgestap het.
"Net voor hy by die kamer ingestap het waar jy was, het Conrad gevra waar sy ma is. Die beskuldigde het geskrik en het in Conrad se rigting gedraai. Conrad het iets gesê soos 'nee, moenie'. Hy het toe in die ander kamer gegaan.
"Die beskuldigde het agter hom aangestap en in die deur gestaan. Toe het Conrad vir 'n tweede keer gesê 'asseblief oom, moenie'.
"Die beskuldigde kan nie onthou dat hy die vuurwapen in Conrad se rigting gehou het nie, maar 'n skoot het afgegaan. Hy het geskrik en gesien Conrad sak inmekaar. Die beskuldigde onthou dat hy in die gang langs die muur gesit het. Hy weet nie wat hy met die vuurwapen gedoen het nie.
"Hy kan onthou dat hy die huis verlaat en geval het. Hy onthou nie hoe lank hy daar gelê het nie, maar onthou dat hy te swak was om op te staan," het Bantjes gesê.
Bonnette het getuig dat sy gehoor het hoe haar seun Kotzé smeek om nie te skiet nie, waarna 'n skoot afgegaan het. Sy het hom weer hoor smeek, waarna twee skote gevolg het.
Sy kon nie met Kotzé praat nie, omdat haar mond met kleefband toegeplak was. Sy het aan die hof gesê sy is daarvan oortuig dat Kotzé die hele voorval beplan het.
Die verhoor duur voort.
– Volg Nuus24 op Twitter
- SAPA
