Korrupte vyf 'gee polisie slegte naam'
2011-09-23 07:01
Virginia – Die vyf polisiemanne en oud-polisiemanne wat hier in een van die opspraakwekkendste korrupsieverhore tot nog toe skuldig bevind is, het die goeie naam en reputasie van die polisie deur die modder gesleep en deel geword van die land se misdaadprobleem.
Dit was Donderdag hier in die hooggeregshof die woorde van regter Faan Hancke waar hy dié vyf en vier van hul vyf makkers altesaam 199 jaar tronkstraf opgelê het.
Japhta Khotule, wat ten tyde van die misdrywe ’n polisieman was en ook broer is van die Vrystaatse LUR, Dan Khotule, is die swaarste van al die beskuldigdes gestraf met effektiewe tronkstraf van 26 jaar.
Hancke het gesê Khotule was die aanvoerder van die sameswering tot moord op die ondersoekbeamptes, ao. Nico Smit en ao. Lizelle Herbst, en die klaer in die saak, Karel Marais, sakeman en boer van Wesselsbron.
“Hy was die planmaker. Daar is gesê sy broer is in die parlement en hy sal help om Smit en Herbst uit die polisie te kry.
“Kort daarna het dié twee skorsingsbriewe uit die eenheid teen georganiseerde misdaad gekry. Dit moet onder die aandag van die kommissaris van die polisie gebring word.”
Hancke het gesê korrupsie is ’n kanker in die samelewing en talle ondernemings het reeds stappe gedoen om dit te bekamp.
“Die vraag is wat doen die polisiediens om korrupsie in sy midde uit te roei?
“Daar is tog baie eerlike en hardwerkende polisiebeamptes soos wat in dié saak gesien kan word, mense soos Smit, Herbst en kapt. Karen Herbert.”
Die misdrywe is haarfyn beplan en elkeen het sy eie taak gehad. Daar is selfs van drie polisievoertuie gebruik gemaak.
“Smit moes uit sy eie sak geld bestee om homself te beveilig en so ook Marais, wat baie uitgawes moes aangaan en selfs sekuriteitswagte moes aanstel.”
Die beskuldigdes is aan sameswering tot moord, ontvoering, gewapende roof, die voordoen as polisiebeamptes en die gebruik van voertuig sonder toestemming skuldig bevind.
Die verhoor van Faan Rossouw, voormalige polisie-informant, is Donderdag nadat sy makkers gevonnis is, geskei omdat hy vandeesweek voor die uitspraak verdwyn het, in sy afwesigheid skuldig bevind is en nou ’n voortvlugtige is.
Adv. Francois Pienaar, aanklaer, het gesê die staat is op sy spoor.
Die beskuldigdes se effektiewe vonnisse is: Molehane Mabuza van Wesselsbron 15 jaar, Andrew Scheepers (begrafnisondernemer van Christiana) 24 jaar, Barney Booysen (werklose van Christiana) 18 jaar, ao. Xolisile Blom 20 jaar, ao. Jabulane Xaba 18 jaar, Khotule 26 jaar, ao. Steven Mtwala 18 jaar, Sechaba Masiane 18 jaar en ao. Sello Mtsala 18 jaar.
Die groep sal vandag in die hooggeregshof in Bloemfontein ’n aansoek om appèl teen hul skuldigbevinding rig.
Volg Nuus24 op Twitter.
- Volksblad