'Korrupsie is leefwyse' – Opname
2012-01-10 19:58
Johannesburg – Die meerderheid van stedelike Suid-Afrikaners voel korrupsie het ‘n leefwyse geword, luidens ‘n opname wat Dinsdag bekend gemaak is.
“Drie-en-tagtig persent van stedelike volwassenes voel dat korrupsie ‘n leefwyse in Suid-Afrika geword het,” het die navorsingsmaatskappy TNS Suid-Afrika in ‘n verklaring gesê.
Vyf-en-tagtig persent van die respondente voel daar is korrupsie in senior vlakke van regering, het die opname gevind.
“Slegs 11 persent en agt persent onderskeidelik stem nié met die persepsies saam nie,” het TNS gesê.
Ses persent het gesê hulle weet nie of korrupsie ‘n leefwyse geword het nie en agt persent het gesê hulle weet nie of daar korrupsie in senior vlakke van regering is nie.
“Wat opmerklik is en kommer wek, is dat dié syfers grootliks onveranderd is sedert 2005,” het TNS gesê.
Soortgelyke uitslae is in 2005 en 2008 gevind.
Die mees onlangse opname het min verskille tussen demografiese groepe gevind.
“Wat ook kommerwekkend is, is dat dié persepsies teenwoordig is by jonger en ouer mense. Dit wil voorkom of die persepsies heeltemal ingegrawe is – dit is ‘sake soos gewoonlik’.”
Ongeveer 2 000 volwassenes in Suid-Afrika se sewe grootste metro-gebiede het einde verlede jaar aan die opname deelgeneem.
- Volg Nuus24 op Twitter
- SAPA