Korporaal sterf toe troep hom skiet
2009-11-14 09:06
Erika Gibson
Pretoria - Noodlottige operasionele ongelukke het vandeesweek die derde soldaat se lewe in ’n week geëis toe ’n troep in opleiding sy korporaal doodgeskiet het.
Die jongste voorval het eergistermiddag by die Infanterie-opleidingskool in Oudtshoorn gebeur terwyl die soldate besig was met skadebeheer-opleiding by Kansasvlakte.
Soldate van die senior kursus vir onderoffisiere was na verneem word besig met voorbereiding met die oog op volgende jaar se Wêreldbeker-sokkertoernooi.
’n Kursusganger het kpl. Tuis Dimakatso Malitisi (36), ’n burgermaglid van die Regiment Christiaan Beyers in Polokwane, tydens die oefening geskiet.
Hy is volgens die weermag na ’n hospitaal in Oudtshoorn geneem, maar is met sy aankoms dood verklaar. Die polisie en die weermag ondersoek die voorval.
Skadebeheer word normaalweg sonder skerp ammunisie gedoen solank dit in die hande van die polisie is. As ’n situasie egter handuit ruk, vorm die weermag die tweede lyn van optrede, het Henri Boshoff van die Instituut vir Sekerheidstudies gesê.
In só ’n geval word skerp ammunisie gebruik soos inderdaad ook met die oefening die geval was.
Verlede week is twee diensvrywilligers in ’n valskermongeluk dood.
Skutters John Mpshe (23) van Brits en Thabang Mokoena (22) van Wepener was besig met hul laaste voorbereidende statiese lynspronge voordat hulle as valskermsoldate sou kwalifiseer.
Albei was by die 44 Valskermregiment by Tempe in Bloemfontein gestasioneer.
Een van die valskerms het glo ’n skeur ingehad, terwyl daar moontlik ook fout met die tweede een was.
In só ’n geval het die valskermsoldate hul noodvalskerms op om terug te val. Nie een van die twee oorledenes het egter na verneem word hul noodvalskerms oopgetrek nie.
Die weermag se raad van ondersoek na dié voorval sal glo onder meer die verpakkingsproses van die valskerms ondersoek om te bepaal of daar wel fout met die skerms was en of die pakproses tekort geskiet het.
– Die Burger