Koppe rol by hospitaal
2009-09-10 16:17
Kaapstad- Twee Oos-Kaapse hospitaalbestuurders is Donderdag geskors na aantygings van nepotisme en swak sorg van pasiënte, het die departement van gesondheid gesê.
Volgens Sizwe Kupelo, woordvoerder van die departement, word klagtes van uithongering van pasiënte by die Madwaleni-hospitaal in Elliotdale ondersoek.
Daar sal ook gekyk word hoe die hospitaal dit reggekry het om 41 persone in 18 beskikbare poste aan te stel. Dit het ook aan die lig gekom dat 23 van die werkers familie van die bestuurders of raadslede van die hospitaal was.
“In een geval is daar vyf mense in een pos aangestel. Ons is nie seker hoe hulle dit gedoen het nie. Al vyf die werknemers het op 1 September begin werk,” het Kupelo gesê.
Kupelo het ook bygevoeg dat die hoof van die hospitaal, asook die menslikehulpbronbestuurder “voorlopig geskors” is.
Daar is die afgelope maand reeds sowat vier senior lede van departement geskors.
“Die departement is ernstig daaroor om korrupsie hok te slaan.”
–Sapa