Kookolie-misdadigers tronk toe
2010-06-22 15:10
Frans Coetzee, Beeld
Prieska – Twee vroue en ’n man wat twee tienermeisies se hande in warm kookolie en op ’n stoofplaat gedruk het omdat hulle vermoedelik kaaskrulle “gegaps” het, is Maandag tronk toe gestuur.
Aanvanklik is net een verdagte, Gilbert Mathe (32), ’n snoepwinkeleienaar van die woonbuurt Mandela Square, in verband met die gruweldaad aangekeer.
Die twee 12-jarige meisies se hande is op 17 Augustus verlede jaar verbrand nadat hulle na Mathe se huis geneem is.
Speurders het later Julia Mathe (25), Midred Ntanbula (25) en ’n 16-jarige seun ook aangekeer in verband met aanranding met die opset om ernstig te beseer.
Gilbert Mathe is tot ses jaar tronkstraf gevonnis. Julia Mathe en Ntanbula is elk vir vyf jaar tronk toe gestuur. Die minderjarige is tot drie jaar tronkstraf gevonnis wat voorwaardelik vir vyf jaar opgeskort is.
- Beeld