Kontrak vir Airbus-projek gekanselleer
2009-11-05 12:13
Kaapstad- Die kabinet het besluit om die kontrak vir die multi-miljardrand se Airbus A400M-militêre vragvliegtuie te kanselleer.
Themba Maseko, woordvoerder, het Woensdag na afloop van die weeklikse kabinetsvergadering gesê dat dié planne vir eers gekanselleer is.
“Die rede hiervoor is weens die feit dat daar ‘n drastiese toename in kostes was. Die projek sou ook nie betyds voltooi word soos vooraf ooreengekom is nie,” het Maseko gesê.
Die lugmag sou sy eerste vliegtuig aanvanklik in November 2010 ontvang het, maar ’n vertraging van meer as 18 maande in die vervaardigingsproses weens probleme met die aandrywingstelsel het dié aflewering beduiwel, het Beeld vroeër berig.
Van die lande wat die grootste bestellings vir die A400M geplaas het, waaronder Duitsland, het al met boetes en kansellasies gedreig as die vervaardigers nie uit hul blokke kom nie.
Die oorspronklike kostes vir die agt vliegtuie sou sowat R17 miljard beloop het. Die kostes het nou egter tot sowat R40 miljard gestyg.
“Die sowat R2.9 miljard wat reeds betaal is sal terugbetaal word. Daar sal ook geen boetes betrokke wees nie as gevolg van die vertragings wat plaasgevind het,” het Maseko gesê.
Hierdie besluit deur die kabinet sal moontlik ‘n invloed hê op die vredestryd in Afrika.
–Sapa