Kontantinspuiting vir JFO
2009-12-31 07:57
Johannesburg - Volgende jaar sal vir die Johannesburgse Filharmoniese Orkes (JFO) op 'n hoë noot begin danksy 'n kontantinspuiting van R36 milj. deur die Nasionale Lotery-trust, het die orkes se bestuur Woensdag gesê.
"Die Nasionale Lotery-trust het ingestem om vir die volgende drie jaar die JFO se vier simfonie-seisoene per jaar, sowel as die verwante ontwikkelings- en onderwysprojekte, te befonds" het Bridget van Oerle, woordvoerder, in 'n verklaring gesê.
Dié befondsing sal die JFO in staat stel om werk te skep vir klassieke musikante, en ook om nuwe talent op te lei.
"Die JFO beplan vier ses week lange seisoene van hoë-gehalte musiek vir 2010," het sy gesê.
Die eerste ses week lange seisoen vir 2010 sal begin op 10 Februarie en eindig op 18 Maart. Die tweede seisoen sal strek van 5 Mei tot 10 Junie, die derde seisoen van 28 Julie tot 2 September en die vierde van 6 Oktober tot 11 November.
Tydens die eerste seisoen sal die internasionaal bekende Suid-Afrikaans-gebore dirigent Gérard Korsten, Bulgarye se Emil Tabakov en Japan se Yasuo Shinozaki die JFO elk twee weke lank lei.
– SAPA