Kommissie waarsku teen Marikana-video
2013-01-29 15:59
Rustenburg – Dit is voortydig om afleidings te maak van die sogenaamde "nuwe" selfoonvideo van die Marikana-skietery, het die Farlam-kommissie Dinsdag gehoor.
"Onder die omstandighede is die kommissie van mening dat dit voortydig is om gevolgtrekkings te maak van die videomateriaal wat in die uitsending ingesluit is," het Ian Farlam, voorsitter van die kommissie, in Rustenburg gesê.
Farlam het bevestig dat twee polisiebeamptes, 'n kaptein Rylands en 'n sers. Mahlatsi, die video op 16 Augustus geneem het.
"Die beeldmateriaal is sonder enige verpligting deur die polisie aan die kommissie verskaf en is op 21 November aan die kommissie gewys."
Hy het gesê die gehalte van die video is swak en dat die stemme nie duidelik hoorbaar is nie.
Farlam het verder gesê nie die polisie of enigiemand anders het voor die kommissie oor die video getuig nie.
Die video is Sondag deur Brittanje se Channel 4 News uitgereik.
Die kanaal het selfoonvideo's uitgesaai wat na bewering op 16 Augustus 2012 deur twee polisiebeamptes opgeneem is.
Die enigste beeldmateriaal wat tot dusver aan die media beskikbaar was, was beeldmateriaal wat deur EWN, eNCA en CNN geneem is.
Die video wat deur die polisiebeamptes geneem is, dui daarop dat baie van die mynwerkers 'n “paar honderd meter weg” van die media af op 'n koppie dood is, het Channel 4 berig.
In die polisievideo kan gehoor word hoe iemand uitroep, “Wag, moenie skiet nie! Moenie skiet nie!”. Dit vind plaas ná 'n mynwerker verby die polisie hardloop. Skote klap sekondes later.
Die beampte wat die video neem loop dan na waar 'n man bewegingloos op die grond lê. “Daai motherf****r. Ek het hom ten minste 10 keer geskiet,” sê een van die beamptes in die video.
Die slagoffer word later as 'n 26-jarige mynwerker geïdentifiseer wat 12 keer geskiet is.
Die sittings duur voort.
– Volg Nuus24 op Twitter
- SAPA
