Kommissie sal Lonmin-slagting ondersoek

2012-08-23 22:01

Pretoria – Pres. Jacob Zuma het bekendgemaak dat ‘n geregtelike kommissie wat uit drie lede bestaan die geweld by die Lonmin-myn waarin 44 mense in Marikana in die Noordwes dood is, sal ondersoek.

Die kommissie se mandaat sal onder andere wees om die optrede van die mynmaatskappy Lonmin te ondersoek, het Zuma Donderdag aan verslaggewers in Pretoria gesê.

Verder sal die kommissie ook ondersoek of Lonmin gepas opgetree het ten opsigte van die dreigement van ‘n uitbreking van geweld op sy perseel.

“’n Ondersoek sal gedoen word om vas te stel of Lonmin sy beste pogings aangewend het om enige dispute op te los,” het Zuma gesê.

Die kommissie sal ook die optrede deur die Suid-Afrikaanse polisiediens ondersoek en sal fokus op die feite en omstandighede wat gelei het tot die gebruik van mag en of dit redelik en regverdigbaar is.

Zuma sê die kommissie sal ook ondersoek instel oor die optrede van die National Union of Mineworkers (NUM) en die Association of Mineworkers and Construction Union (Amcu).

Ian Farlam, die afgetrede regter van die appèlhof, sal die voorsitter van die kommissie wees. Die senior advokate Bantubonke Tokota en Pingla Hemraj sal hom met die ondersoeke bystaan.

– Volg Nuus24 op Twitter

 

- SAPA