Kommissie ondersoek etikettering van vleis
2013-02-28 12:07
Kaapstad – Die Nasionale Verbruikerskommissie kan die verkeerde etikettering van vleisprodukte ondersoek, het Phumla Williams, waarnemende woordvoerder van die regering, Donderdag gesê.
Williams het gesê die kabinet weet van berigte wat paniek veroorsaak het oor die verkeerde etikettering van produkte.
Die Verbruikerswet het algemene standaarde uiteengesit vir die bemarking van goedere en dienste, het sy gesê.
"Volgens die wet mag partye in die verskaffingsketting nie goedere of dienste bemark op 'n manier wat 'n valse of misleidende voorstelling van die goedere en dienste is nie."
Dr. Rob Davies, minister van handel en nywerheid, het die Nasionale Verbruikerskommissie gevra om 'n dringende ondersoek na die kwessie te begin.
"Dit is omdat die kwessie dalk verreikende gevolge en 'n impak op die breër verbruikerpubliek kan hê," het Williams gesê.
Vroeër vandeesweek het dit aan die lig gekom dat navorsing deur prof. Louw Hoffman,en dr. Donna-Maree Cawthorn van die Universiteit van Stellenbosch getoon het dat 68% van maalvleis, frikadelle, wors, gedroogde vleis en vleis van delikatesse bestanddele bevat wat nie op die verpakking aangedui word nie.
Hoffman het gesê die hoofrede tot kommer is dat dit dalk allergiese reaksies kan veroorsaak.
Hy het gesê allergene soos soja en gluten, wat allergiese reaksies tot gevolg kan hê, is in die vleisprodukte gevind.
Hoffman sê hulle het onder meer waterbuffel, donkie en bokvleis in produkte gevind, terwyl vark en hoender ook in vleisprodukte was sonder dat dit aangedui is.
Verskeie voorvalle is die afgelope ruk in Europa aangemeld waar perdevleis in voedselprodukte wat as beesvleis gemerk is, gevind is.
Perdevleis is in voedselprodukte soos hamburgers, lasagne, pastasous, skooletes en selfs hospitaaletes in Europa gevind.
– Volg Nuus24 op Twitter
- SAPA
