‘Kollig ‘nie glansryk genoeg vir Boesak’
2009-11-05 07:00
Kaapstad - Dr. Allan Boesak, voormalige Wes-Kaapse Cope-leier, is nie gedruk om te loop nie, maar het inderdaad gekies om te spring.
Só het Mbulelo Ncedana, Cope-hoofsweep in die provinsiale parlement, gister teruggekap ná Boesak se bedanking.
Ncedana was glad nie spaarsamig met die klappe wat hy in sy verklaring uitgedeel het nie. Hy het Boesak onder meer daarvan beskuldig dat hy en Simon Grindrod, voormalige Cope-verkiesingshoof, kop in een mus is.
“Dit is asof hy Grindrod en ander se verskonings geknip en geplak het.
“Dit is vir ’n geruime tyd reeds duidelik Boesak was, om watter rede ook al, nie gemaklik binne die strukture van Cope nie,” het Ncedana gesê.
Hy het gesê Cope-lede het gehoor van sy vergaderings met ander politieke partye, veral die ANC.
Lynne Brown, leier van die opposisie in die provinsiale parlement, en Mcebisi Skwatsha, ANC-LPP, het ’n ope verwelkoming gerig aan Cope-lede wat na die ANC wil terugkeer.
Lizel Steenkamp berig verskeie Cope-LP’s het gesê die kollig van die Wes-Kaapse wetgewer was nie glansryk genoeg vir Boesak nie.
Hy wou in die nasionale parlement dien.
Dié charismatiese kerkman is boonop beskryf as “iemand wat sterk op die materiële ingestel is”.
Daar was wel pogings om Boesak in die Nasionale Raad van Provinsies (NRP) te kry, maar Cope se Wes-Kaapse strukture het vasgeskop om Onell de Beer in die NRP te behou.
“Allan het te min aandag (in die wetgewer) gekry. Hy is ’n showman. Hy wou op ’n nasionale vlak rimpelings maak,” het ’n senior LP gesê. Volgens ’n lid van Cope se nasionale komitee was Boesak ’n geruime tyd lank ongelukkig.
“Hy wou op ’n nasionale vlak wees, maar hy is juis in die Wes-Kaap ontplooi om leiding te gee – iets wat hy nie gedoen het nie. Hy kon sy eie platform geskep het, maar het net teruggesit.”
- Die Burger