Kollege se deure bly oop danksy Nzimande
2010-10-24 08:57
Kaapstad - Blade Nzimande, minister van hoër onderwys en opleiding, gaan
ingryp om die Hugenote Kollege in Wellington se voortbestaan te
verseker.
Die kollege is deur sluiting in die gesig gestaar omdat
dit ’n private instelling is wat, danksy samewerking met die
Universiteit van Stellenbosch, ook geld van die belastingbetaler
ontvang.
Dit is strydig met die Wet op Hoër Onderwys, wat nie
vir sulke ooreenkomste tussen private en staatsinstellings voorsiening
maak nie.
Die gevolg sou wees dat honderde studente nie hul
studies ongestoord sou kon voortsit nie, terwyl dosente hul poste sou
moes ontruim.
Volgens Nqaba Nqandela, stafhoof in Nzimande
se kantoor, het die minister egter besluit om, na aanleiding van die
tekort aan maatskaplike werkers in Suid-Afrika, in te gryp om sluiting
te voorkom.
In die tweede plek sal die ministerie die kollege
volgende jaar daadwerklik bystaan sodat dit aan die vereistes van die
wet kan voldoen.
“Die ministerie besef terdeë wat die omvang van
die nood op maatskaplike gebied is en sal alle stappe doen om die
voortsetting van die studente se studies te verseker.
“Die
studente kan nie ly onder die probleme wat daar oor die kollege se
wetlike posisie is nie,” het Nqandela by navraag aan Rapport gesê.
Die
minister se ingryping volg op versoeke op politieke vlak. Nqandela het
spesifiek verwys na versoeke van me. Helen Zille, Wes-Kaapse premier, en Edna Molewa, minister van maatskaplike ontwikkeling, dat die
kollege moet aanhou funksioneer.
Harde politieke werk is ook agter die skerms gedoen deur die DA-LP’s dr. Junita Kloppers-Lourens en Patricia Kopane.
Prof. Johan Viljoen, die rektor van die kollege, was baie versigtig toe Rapport hom met die nuus kontak.
“Ons sal wag vir amptelike korrespondensie van die minister voordat ons kommentaar lewer,” het hy gesê.
- Rapport