Koeverte is op, so duisende kry nie rekening
2012-01-27 07:44
Pretoria – Sowat 180 000 huishoudings in die Tshwane-metrogebied het vandeesmaand laat of geen munisipale rekeninge gekry nie omdat die munisipaliteit te min koeverte gehad het.
Die munisipaliteit stuur maandeliks sowat 800 000 rekeninge uit, maar kon almal nie vroeër vandeesmaand stuur nie omdat sy diensverskaffer glo weens die afgelope feestyd te laat genoeg koeverte kon lewer.
Die metroraad het in ’n verklaring gesê hy hoop om die laaste munisipale rekeninge wel teen Saterdag te pos.
Die diensverskaffer sal vervang word as hy hom nie regruk nie.
Die metroraad het gister gehoor die ouditeur-generaal (OG) het vir die tweede keer in ’n ry ’n ongekwalifiseerde oudit aan Tshwane toegeken.
Die OG het egter in sy ouditverslag gewaarsku daar is talle sake waaraan die metrobestuur aandag moet gee.
Verskeie Tshwane-entiteite het gekwalifiseerde ouditmenings ontvang.
Prof. Antony Melck, ’n uitvoerende direkteur van die Universiteit van Pretoria en voorsitter van Tshwane se nuwe oudit-en-prestasie-komitee, het op die metroraadsvergadering waar die OG sy ouditverslag bekend gemaak het, gesê ’n skoon oudit vir die tweede keer in ’n ry is ’n besondere prestasie.
Tog, het hy gewaarsku, dit beteken nie Tshwane kan nie nóg beter vaar nie.
Die tekortkominge wat die OG uitgewys het, sal in oorleg met die stadsbestuur aandag kry.
Brandon Topham, DA-koukusleier, het gesê sy party sal hom eers later oor die OG se verslag uitlaat omdat hy dit laat ontvang het en daar nie tyd was om dit behoorlik te bestudeer nie.
Volg Nuus24 op Twitter
- Beeld