Koerant moet jammer sê oor Mandela-begrafnis
2011-07-22 11:08
Johannesburg – Zwelivelile (Mandla) Mandela, oudste kleinseun van oudpres. Nelson Mandela, eis 'n verskoning van 'n Sondagkoerant nadat hy daarvan beskuldig is dat hy die televisieregte van sy oupa se begrafnis wou verkoop.
Mandla dreig ook met regstappe teen Sunday World indien die koerant nie 'n verskoning publiseer nie.
Dié koerant het in 2009 berig dat Mandla die uitsaairegte van sy oupa se begrafnis vir R3 miljoen aan die SABC verkoop het.
Die SABC het Donderdagoggend 'n mediakonferensie gehou waar dit aangekondig is dat 'n interne verslag – 25 maande ná die aantygings gemaak is – afgehandel is.
Dié verslag het getoon dat die kontrak nie bestaan nie, en dat die SABC nooit vir die regte van 'n openbare geleentheid soos 'n staatsbegrafnis sal betaal nie.
"Dit het die Mandela-familie baie pyn veroorsaak," het Mandla gesê.
"Ons is bereid om met die koerant te versoen as hulle om verskoning vra. Ons sal net bly wees as die saak afgehandel is. Ons sal niemand se begrafnis bespreek terwyl hulle nog lewend is nie."
– Lees meer hier
– Volg Nuus24 op Twitter