Koerant appelleer dalk McBride-uitspraak
2010-03-02 15:05
Bloemfontein - The Citizen gaan hom dalk tot die grondwethof wend om teen 'n uitspraak van die appèlhof in die guns van Robert McBride te appelleer, het die koerant Dinsdag gesê.
Die appèlhof het beslis dat die koerant verkeerd was om die voormalige Ekurhuleni-metropolisiehoof 'n moordenaar te noem sedert hy amnestie van die Waarheids-en-Versoeningskommissie (WVK) gekry het.
Die saak spruit voort uit 'n reeks berigte wat in 2003 voor McBride se aanstelling as metropolisiehoof gepubliseer is.
The Citizen het geappelleer teen ’n bevinding van die hooggeregshof in Johannesburg dat die koerant McBride R200 000 moet betaal omdat daar na hom as ’n moordenaar verwys is, asook weens ’n beskrywing dat hy “twyfelagtige flirtasies met wapenhandelaars in Mosambiek gehad het”.
Dié bedrag is na R150 000 verminder.
In kommentaar wat Dinsdag deur die koerant gepubliseer is, het hy na die minderheidsuitspraak van regter K.K. Mthinyane verwys.
Mthinyane het gesê The Citizen se berigte oor McBride was billike kommentaar en McBride behoort geen sent te kry nie.
Die koerant het ook gesê dat die verwysing na McBride as 'n moordenaar is streng gesproke feitelik korrek is.
In die minderheidsuitspraak is ook gesê dat die interpretasie van die WVK-wet soos weergegee deur die meerderheidsuitspraak 'n demper sal plaas op vryheid van uitdrukking wat onder die grondwet gewaarborg word.
Martin Williams, redakteur van The Citizen, het gesê hy stem saam met dié interpretasie.
Die koerant se besluit sal ná 'n vergadering met sy prokureurs bekend gemaak word.
– Sapa