'Koeëlvaste baadjie nie genoeg'
2009-10-13 07:30
Virginia Keppler
“Daar is nie ’n koeëlvaste baadjie vir jou kop nie. Geen koeëlvaste baadjie sou dié jong man se lewe kon red nie.”
So het komm. Khomotso Phahlane, die polisie se afdelingskommissaris vir personeeldienste, gister by die Silverton-polisiekantoor in Pretoria gesê nadat hy studentekonst. Mandla Ngwenya (23) se ma en ander familielede ontmoet het.
Ngwenya is die tweede polisieman wat binne ’n week doodgeskiet is terwyl hy op ’n klagte gereageer het.
Hy het ’n koeëlvaste baadjie gedra toe hy Saterdagnag in Mamelodi-Oos, oos van Pretoria, in die kop geskiet is.
Kapt. Charl Scheepers, operasionele bevelvoerder van misdaadvoorkoming by die Brooklyn-polisiekantoor in Pretoria, het nie sy koeëlvaste baadjie aangehad toe hy die vorige Saterdagaand by ’n bouterrein in Lynnwood twee keer in die maag geskiet is nie.
Scheepers het die oggend voor die voorval moesies van sy rug laat verwyder en kon nie die baadjie dra nie omdat sy rug nog sensitief was.
“Misdadigers is wreed en dié jongman het die hoogste prys betaal,” het Phahlane gesê. “Dit is ongelukkig dat polisielede wat ons land met trots dien, deur misdadigers geteiken word.”
Die gemeenskap wil volgens Phahlane oorreageer as die minister van polisie oor art. 49 van die Strafproseswet (die “skietwet”) praat, maar die polisie waardeer die regering se poging om dié wet te wysig.
Adjunk- nasionale kommissaris Magda Stander en komm. Perumal Naidoo, Gautengse polisiehoof, was ook gister by die polisiekantoor om Ngwenya se familie te ondersteun.
“Ons gaan op die misdadigers inzoem, hulle aankeer en die oorlog teen misdaad wen. Ons sal niks onaangeraak los om dié polisieman se moordenaars aan te keer nie,” het Stander gesê.
“Verlede Vrydag het ons kapt. Scheepers begrawe en vandag staan ons al weer by ’n polisieman se familie wat deur ’n misdadiger gedood is.”
Volgens Stander was Ngwenya se familie te getraumatiseerd om met die media te praat. “Hy was sy ma ( Mavis Ngwenya) se enigste kind. Hy was twee jaar in die polisie en sou in Desember konstabel geword het,” het Stander gesê.
Sy het gesê polisielede word daagliks sensitief gemaak oor hoe hulle hulself moet beskerm wanneer hulle op ’n klag reageer. “Lede ondergaan ook ’n oorlewingskursus en word aangemoedig om hul koeëlvaste baadjies te dra,” het sy gesê.
Naidoo het gesê Ngwenya was toegewyd, lojaal en het nooit gehuiwer om na ’n misdaadtoneel te gaan nie.
Volgens Stander sal Ngwenya op Piet Retief begrawe word, waar sy ma woon. Hy sal met volle militêre eerbewys begrawe word as sy familie daartoe instem.
- Beeld