Knysna-busramp: remme glo foutief
2011-08-24 12:23
Kaapstad – Die busongeluk in Knysna waarin 14 skoolkinders en die bestuurder Woensdag dood is, se remme was glo foutief, waarna die bus oor 'n brug in 'n rivier geploeg het, berig Eyewitness News.
Die dodetal is steeds besig om te styg.
Donald Grant, Wes-Kaapse minister van onderwys, het gesê hy is "diep geskok en hartseer oor die tragiese ongeluk" waarin leerders van die Laerskool Rheenendal Woensdagoggend betrokke was.
"Namens die Wes-Kaapse departement van onderwys en die provinsiale regering wil ek my medelye aan die families, wat hul geliefdes verloor het, betuig. Hulle is in ons gedagtes en gebede," het Grant in 'n verklaring gesê.
Grant het gesê hy en Robin Carlisle, Wes-Kaapse minister van vervoer en openbare werke, is onderweg na die ongelukstoneel "om bystand te bied waar ek kan".
Kapt. Malcom Pojie, ’n polisiewoordvoerder, het gesê die busbestuurder het vermoedelik beheer oor die voertuig verloor.
"Vyftien lyke is verwyder. Veertien kinders en die busbestuurder."
Pojie het gesê 42 kinders is hospitaal toe geneem en word vir ligte beserings en skok behandel, berig Sapa.
"Ons is nie seker hoeveel kinders in die bus was nie. Ons haal die lyke uit die water en duikers sal aanhou soek vir nog lyke."
Die kinders was tussen die ouderdomme van sewe en 17.
'n Groep sielkundiges en maatskaplike werkers is op die toneel en by die Knysna Provinsiale Hospitaal waar leerders, ouers en personeel berading ontvang, het Bronagh Casey, Grant se woordvoerder, gesê.
Casey het gesê busse is ook beskikbaar gestel om ouers na die skool en hospitaal te vervoer.
"Die skool en distrikpersoneel is besig om 'n lys van die oorlewendes saam te stel."
Die Wes-Kaapse departement van onderwys het 'n taakspan aangestel om die oorsaak van die ongeluk te ondersoek.
Die polisie en duikers van die Nasionale Seereddingsinstituut (NSRI) is op die toneel.
Die wrak van die bus is steeds in die dam vasgekeer.
Davids het gesê 'n verklaring sal later uitgereik word.
– Volg Nuus24 op Twitter
- Nuus24