Kleuter kritiek ná botsing op berugte pad

2012-12-10 10:17

Kaapstad – ‘n Kleuter is uit ‘n motor geslinger nadat 'n gesin in ‘n ongeluk op die berugte Moloto-pad in Pretoria betrokke was.

Vanessa Jackson van ER24 het in ‘n verklaring gesê die gesin van vier het langs die pad stilgehou om vinnig te strek voordat hulle met hul reis sou voortgaan.

Terwyl die pa buite hul Volkswagen Golf gestaan het, het ‘n taxi teen die voorkant van die motor gebots. Die ma en hul twee kinders – ‘n tienermeisie en die driejarige kleuter – was ten tyde van die botsing nog in die voertuig.

Paramedici het die kleuter in ‘n kritieke toestand buite die voertuig gevind. Die kind is vermoedelik uit die voertuig geslinger.

Jackson sê die ma en dogter is vir matige beserings behandel voordat al drie na ‘n hospitaal geneem is.

Niemand in die taxi is beseer nie.

Volgens die woordvoerder sal die polisie die ongeluk ondersoek.

Volg Nuus24 op Twitter

- Nuus24