Klem op Shrien se gesondheid geplaas
2011-12-13 18:59
Londen – Die gesondheid en lewe van die Britse sakeman Shrien Dewani sal in gevaar wees as hy aan Suid-Afrika uitgelewer word om tereg te staan op aanklag daarvan dat hy die moord op sy vrou tydens hul wittebrood beplan het, het die Londense Hooggeregshof Dinsdag gehoor.
Dewani se appèlaansoek word in dié hof aangehoor.
Die Persvereniging berig dat Dewani, wat enige skuld ontken, daarvan beskuldig word dat hy ‘n huurmoord op sy vrou, Anni, gereël het in November verlede jaar in Kaapstad.
Die Britse minister van binnelandse sake, Theresa May, het ‘n bevel vir sy uitlewering onderteken nadat Distriksregter Howard Riddle in Augustus beslis het Dewani (31) moet aan Suid-Afrika uitgelewer word om verhoor te word.
Clare Montgomery, regsverteenwoordiger van Dewani, het Dinsdag twee regters gevra om die uitlewering te keer, op gronde daarvan dat sy geestesgesondheid só agteruitgegaan het dat hy “te siek is om uitgelewer te word” en ‘n selfmoord-risikogeval is.
Familielede het geluister soos Montgomery gesê het hy is ook in gevaar van geweld deur ander gevangenes, insluitende seksuele geweld, indien hy in Suid-Afrika aangehou word.
Dewani is met ernstige post-traumatiese stresversteuring (PTSD) en ernstige depressie gediagnoseer. Hy was nie by Dinsdag se verhoor nie.
Montgomery het gesê Dewani is só siek dat hy nie daartoe in staat sou wees om instruksies aan sy regspan te gee of om die verrigtinge te volg nie. ‘n Uitlewering moet uitgestel word totdat hy herstel het, het Montgomery gesê.
Die verhoor gaan Woensdag voort en sal na verwagting twee dae duur.
- Volg Nuus24 op Twitter
- SAPA