Klein DJ se lewe met roerende diens gevier
2011-12-29 10:18
Port Elizabeth – Dit was ’n diens om sy seun, wat vir hom en sy vrou, Marcelle, ’n geskenk van die Here was, se kort lewe op aarde te vier.
Só het De Wet Barry, oud-Springbokrugbyspeler en voormalige kaptein van die OP-Kings, gister aan roubeklaers gesê wat die troosdiens vir klein DJ (2) in die NG kerk Hoogland in Broadwood bygewoon het.
DJ is verlede Dinsdag (20 Desember) ná ’n kort siekte aan longontsteking in die Life-St. George-hospitaal dood.
“Vir twee jaar, twee maande en 18 dae het die Here jou aan ons geleen,” het ’n emosionele Barry gister gesê.
“Ons huis is nou stil. Woorde kan nie beskryf hoe ons jou mis nie. Ons dra jou in ons harte vir die res van ons dae en kan nie wag om jou by Liewe Jesus te sien nie.”
Die foto’s op die begrafnisbrief wys ’n lewenslustige peuter met ’n breë glimlag.
Die kerkgangers was erg aangedaan nadat vier video’s vertoon is waarin DJ onder meer probeer fluit het met twee vingers in sy mond en met sy ma se rooi handsak en twee verskillende skoene van sy pa gestaan het.
Barry se stem het plek-plek weggeraak terwyl hy oor sy kind gepraat het.
DJ word Saterdag op Worcester begrawe.
– Volg Nuus24 op Twitter
- Volksblad