Klagte van Matie verwerp
2009-11-16 07:24
Philip de Bruin
Kaapstad-Nege regters van die konstitusionele hof het eenparig beslis dat die Matie-student wat aanvoer hy word “onophoudelik en meedoënloos” deur mede-studente geteister, behoort nie nou al toegang tot die hoogste hof in die land te kry nie.
Patrick Msimanga, ’n mediese virologie-student in sy vierde jaar, het in hofstukke voor hoofregter Sandile Ngcobo aangevoer dat die vlak van teistering wat hy van (wit) studente moes verduur, só erg was dat hy sy koshuis op die Tygerberg-kampus van die Universiteit Stellenbosch moes verlaat.
Hy het sy klagtes onder die aandag van die US se bestuur gebring, maar geen daadwerklike poging is aangewend om hom te help nie, het hy betoog.
Ook sy klagte by die gelykheidshof in Kaapstad het op niks uitgeloop nie, onder meer omdat hy nie besonderhede van die “oortreders” en detail van die teistering aan die hof verskaf het nie.
Voor Ngcobo het Msimanga aangevoer dat hy daarop aandring dat sy grondwetlike reg op gelyke behandeling en op menswaardigheid beskerm moet word.
Onder leiding van Ngcobo het nege regters van die konstitusionele hof egter Vrydagmiddag laat ’n bevel gemaak waarin hulle Msimanga se aansoek om toegang tot dié hof verwerp.
“Dit is nie in die belang van die regspleging dat die geding in hierdie stadium in die konstitusionele hof aangehoor word nie,” het hulle gesê.
Dit staan Msimanga nou vry om sy gedinge in die hooggeregshof, die appèlhof en moontlik dan ook weer in die konstitusionele hof, te voer.
- Die Burger