Klagte nadat Malema man se erf 'steel'
2012-01-08 08:42
Carien du Plessis en Adriaan Basson
Johannesburg – Die polisie ondersoek nuwe klagtes van korrupsie, bedrog en diefstal teen Julius Malema, die geskorste ANC-jeugligaleier, in verband met die “verkoop” van ’n erf in 2007.
Matane Mphahlele, ’n sakeman en eertydse vriend van Malema, beskuldig Malema daarvan dat hy ’n waardevolle stuk grond wat aan hom behoort het in Sterpark, Polokwane, gesteel het.
Mphahlele beweer Malema het met behulp van sy prokureur en munisipale beamptes onwettig die erf in sy naam oorgedra en dit kort daarna teen ’n reusagtige 300% wins herverkoop.
Mphahlele het verlede Donderdag ’n klag by die Polokwane-polisiekantoor ingedien teen Malema, Maboku Mangena, ’n prokureur, Clifford Motsepe, hoof van Limpopo se behuisingsdepartement, asook senior munisipale beamptes. Volgens hom het hy dit gedoen omdat dit “in die openbare belang is met al die korrupsie wat in die regering aangaan”.
Ao. Lesiba Ramoshaba, ’n polisiewoordvoerder, het bevestig ’n klag is by hulle ingedien en dat die handelstak dit ondersoek.
Dokumente in die munisipale lêer wys die erf was op 4 April 2007 nog in Mphahlele se naam geregistreer, maar is dieselfde dag na Malema oorgedra teen ’n koopprys van R222 300.
Dit is kort daarna, op 29 Mei 2007, teen R680 000 verkoop.
Floyd Shivambu, Malema se woordvoerder, het nie op navrae gereageer nie.
Motsepe, wat ook op die SAUK-raad dien, het aan City Press, Rapport se susterkoerant, gesê hy gaan nie op navrae reageer nie. Sy woorde was: “Hou aan droom.”
Mangena was geskok om te hoor ’n klag is ingedien, maar sal “op die gepaste tyd en forum” daarop reageer.
Volg Nuus24 op Twitter
- Rapport