Klag teen Wimpy-bestuurder teruggetrek
2011-10-14 07:00
Bloemfontein – ’n Klag van beweerde diefstal by sy werkplek is teruggetrek teen Steven Williamson (30), vermiste bestuurder van die Wimpy-restaurant op Prellerplein in Bloemfontein.
Intussen het sy vrou, Béola, hom Donderdag in ’n hartroerende pleitbrief gesmeek om terug te keer, al is daar dalk redes waarom hy skugter is om dit te doen. Sy sal onvoorwaardelik by hom staan.
In haar brief sê sy:“My Lief, dis vandag die sesde dag vandat ek jou laas by my gehad het. In die ses dae het my hele lewe en bestaan in duie gestort. Ek kan nie slaap nie, ek lê en wag die hele nag dat jy dalk aan die venster kom klop. Ek kan nie eet nie, want hoe weet ek daar waar jy is, het jy ooit iets om te eet? Ek wil jou so graag net by die huis hê, jy het niks om voor bang te wees nie. Ek sal by jou staan, maak nie saak wat nie!”
Daan van der Vyver, eienaar van die Wimpy-restaurant, sê hy wil Williamson nie vervolg nie.
“Al wat ek hoop, is dat Steven veilig sal terugkom.”
Lt.kol. Bennie van den Heever, bevelvoerder van die Bayswater-polisiekantoor, sê ’n klag van die diefstal van geld wat Saterdag deur van der Vyver ingedien is, is Donderdag teruggetrek.
Van den Heever sê al wat nou ondersoek word, is Williamson se verdwyning omdat hy as ’n vermiste persoon by die polisie aangemeld is.
Van den Heever sê die polisie se laaste leidraad in die stad was beeldmateriaal van die Engen-vulstasie op Prellerplein waar Williamson Saterdag voor sy verdwyning brandstof ingegooi het.
Williamson se vrou, familie en vriende is rasend van bekommernis.
’n Facebook-groep Search for Steven Williamson het Donderdag reeds meer as 1 200 ondersteuners gehad.
Mev. Williamson sê sy wil net haar man terughê. Dit is al.
“Ek gee nie om wat mense sê nie. Ek soek Steven terug. Ons sal op 10 Desember vanjaar 11 en ’n half jaar saam wees. Op 3 November is ons vier jaar getroud. Ons het planne gemaak om saam op Jeffreysbaai te gaan vakansie hou.”
Enigiemand met inligting oor waar Williamson kan wees, kan Leon Rossouw, bekende selfoonspeurder, by 083-410-0900 bel, of die Bayswater-polisiekantoor by 051-406-2602.
Volg Nuus24 op Twitter
- Volksblad