Jaagtog ná kitsbank opgeblaas word

2012-11-28 10:43

Kaapstad – 'n Kitsbank is Woensdagoggend in Eersterivier, Kaapstad, opgeblaas, het die polisie in die Wes-Kaap gesê.

Kapt. Frederick van Wyk het gesê 'n groep het kort ná middernag 'n kitsbank by 'n supermark in Londenweg geteiken. Die verdagtes het met verskeie geldhouers gevlug.

Die polisie het op pad na die toneel 'n wit Mazda verby hulle sien jaag en dié motor agternagesit, maar hulle 'n rukkie later verloor.

Die motor is later verlate in Vyfdelaan in Malibu Village gevind.

Niemand is tot dusver in hegtenis geneem nie.

"Die polisie is bekommerd oor die onlangse toename in bomaanvalle op kitsbanke en alles word gedoen om die skuldiges vas te trek," het Van Wyk gesê.

Van Wyk het mense gevra om versigtig te wees wanneer hulle vroegoggend kitsbanke gebruik.

– Volg Nuus24 op Twitter

- SAPA