Kitsbank in Brakpan opgeblaas
2011-04-19 23:00
Johannesburg – ‘n Kitsbank is in Brakpan aan die Oos-Rand opgeblaas en ‘n onbekende hoeveelheid geld gesteel, het die polisie in Gauteng Dinsdag gesê.
“Vyf gewapende mans het Maandagaand omstreeks 20:00 met R5-aanvalsgewere by ‘n winkel ingestorm en die Eerste Nasionale Bank-kitsbank opgeblaas,” het kapt. Petros Mabuza, polisiewoordvoerder, bekend gemaak.
Na bewering het die verdagtes die personeel en kliënte in die winkel aangesê om op die grond te lê alvorens hulle die kitsbank met plofstof opgeblaas het.
Volgens Mabuza was daar heelwat geld in die OTM omdat dit vir ‘n ruk buite werking was.
“Niemand is in die voorval beseer nie. Geen verdagtes is nog in hegtenis geneem nie,” het Mabuza gesê.
Volg Nuus24 op Twitter.
- SAPA