Kindersterftes skok
2011-08-11 07:05
Bloemfontein - Uit elke 1 000 babas wat in die Noord-Kaap gebore word, sterf 54,4 voordat hulle ’n jaar oud word.
Uit elke 1 000 babas wat hier gebore word, sterf 73,4 voordat hulle vyf jaar oud word.
Dié skokkende statistieke is Woensdag deur prof. André Venter, hoof van die Vrystaat se gesondheidsdepartement se eenheid vir pediatrie en kindergesondheid, bekend gemaak.
Venter was een van die sprekers op die gesondheidsdepartement se kindersorg-konferensie in Bloemfontein.
Hy sê die vyf grootste redes waarom die kinders sterf, is infeksie in die ingewande, longontsteking, respiratoriese en kardiologiese redes, wanvoeding en vroeë geboortes.
Venter sê die meeste van die siektes kan genees word indien die regte mediese sorg toegedien word.
Hy sê dit is veral die aantal sterftes voordat die babas een jaar oud word, wat erg kommer wek.
“Te veel kinders gaan dood. Heeltemal te veel kinders gaan in ons hospitale dood.”
Voorts sê Venter die gesondheidsdepartemente oor die land staan voor reuse-uitdagings.
“Armoede moet as een van die redes van dood raakgesien word. Die redes waarom kinders doodgaan, moet dringend aandag kry.
“Alles oor vigs en MIV moet aandag kry.”
Hy het egter gewaarsku dat daar sekere uitdagings is wanneer dit by statistieke soos hierdie kom.
“Statistieke is slegs so goed soos die inligting wat deurgegee word.
“Teen die tyd wat die inligting deurgegee word, is dit reeds verouderd. Statistieke hou ook nie met vinnige verandering by nie en daar is onderliggende komplikasies wat nie deur die statistieke gewys word nie.”
Die meeste van die statistieke oor die kindersterftes is van 2008, maar Venter meen dit is steeds ’n goeie prentjie van hoe sake vandag staan.
In die Vrystaat lyk die prentjie ook glad nie beter nie.
Die meeste sterftes van kinders onder vyf jaar kom hier voor.
Uit elke 1 000 babas wat gebore word, sterf 84,3 tussen 1 en 12 maande.
Uit elke 1 000 babas wat gebore word, sterf 110,3 voordat hulle vyf jaar oud word.
Dié sterftesyfers is bykans twee keer soveel as in die res van die land.
Dr. Lesley Bamford, van die nasionale gesondheidsdepartement, sê daar is ’n stelsel in plek om die sterftes van kinders in staatshospitale te monitor.
Daar word probeer om die stelsel deurlopend te verbeter.
“Die stelsel is ’n oudit van die sterftes in hospitale en dit stel gesondheidswerkers in staat om die sorg wat kinders ontvang, te reguleer.”
Haar aanbevelings om kindersorg te verbeter is om ’n beter beleid in werking te stel, om die administratiewe proses te verbeter, om beter kliniese sorg te lewer en genoegsame opleiding te verskaf.
Volg Nuus24 op Twitter.
- Volksblad