Kinders sterf in Vrystaat ná hulle gif inasem

2012-11-18 15:00

Parys – Twee kinders in Tumahole naby Parys in die Vrystaat is Vrydag dood nadat hulle vermoedelik 'n giftige stof ingeasem het, het OFM Sondag berig.

'n Woordvoerder vir die polisie, Khehla Sitole, het gesê 'n driejarige seuntjie en sy eenjarige suster het na bewering in hul huis gespeel terwyl hul ma buite was.

Die twee het glo 'n bottel wat vermoedelik gif ingehad het in die hande gekry, die walms ingeasem en flou geword.

Die ma het haar kinders na 'n plaaslike kliniek geneem, maaar hulle is albei met hul aankoms dood verklaar.

'n Verpleegster van die kliniek wat na die huis is om die giftige vloeistof te ondersoek het ook daarvan ingeasem en is in 'n hospitaal in Vereeniging opgeneem.

Sitole het gesê die bottel gif sal forensiese toetse ondergaan om die inhoud daarvan te bepaal.

Volg Nuus24 op Twitter.

– OFM