Kinders stem vir Madiba
2009-11-21 04:54
Stockholm. – Oudpres. Nelson Mandela en sy vrou, Graça Machel, is gister as wenners van ’n kinderregteprys aangewys. Sewe miljoen kinders het aan die stemmery deelgeneem.
“Ons is besonder geëerd om as die Dekade-kinderregte-helde aangewys te word,” het die egpaar in in verklaring gesê.
“Vir ons albei is dié toekenning baie, baie spesiaal, gegewe die plek wat kinders in ons harte en lewens het.”
Mandela en Machel is uit 13 voormalige wenners van die Wêreldkinderprys gekies, het die organiseerders gesê.
Die prysgeld beloop altesaam 1,1 miljoen kronor (R1,6?miljoen), waarvan Machel en Mandela 500?000 kronor (R757?594) gaan kry.
Die ander 12 benoemdes sal die res van die prys deel.
Die toekenningsplegtigheid is op 26 April in Stockholm.
Die aantal stemme is nie bekend gemaak nie omdat “al die benoemdes wenners is”, het mnr. Andreas Lonn, ’n woordvoerder, gesê.
Mandela kry die prys vir sy “lewenslange stryd om die kinders van Suid-Afrika van apartheid te bevry en vir sy onwrikbare steun vir hul regte”.
Machel word vereer vir haar werk vir weerlose kinders.
– Sapa-DPA