Kinders nog in hospitaal ná weerlig hulle tref

2013-02-14 11:52

Johannesburg – Drie skoolkinders is nog in die hospitaal nadat hulle vroeër die week deur weerlig getref is, het Gauteng se departement van onderwys gesê.

Charles Phahlane, woordvoerder, sê twee van dié pasiënte is seuns van die King Edward VII-skool (KES) in Parktown, Johannesburg. ‘n Meisie van Protea Glen-hoërskool in Soweto is ook nog in die hospitaal.

“Hulle is in die intensiewe sorgeenheid,” het hy gesê.

‘n Derde KES-leerling is in ‘n stabiele toestand en word in die hospitaal vir waarneming gehou.

“Die dokter sê hy sal moontlik vandag ontslaan word.”

Vier Protea Glen-meisies – almal 16 jaar oud – is deur die weerlig geslaan terwyl hulle op pad huis toe was. Twee van hulle is behandel en sedertdien ontslaan.

Volg Nuus24 op Twitter

- SAPA