Seksvideos: Kinders moes toneel speel
2010-12-08 15:54
Johannesburg - Twee kinders moes toneel speel en is aangesê wat om te doen tydens die maak van pornografiese video’s, het die Pretoria Noord-landdroshof Woensdag gehoor.
“Hulle het die kinders aangesê wat om te doen tydens die maak van die films,” het die staatsaanklaer, Tanya Carstens, uit ‘n verklaring van die ondersoekbeampte, Tania Lourens, gelees.
Lourens het gesê op 12 Oktober het die twee kinders – wat voorheen in pleegsorg by twee van die agt beskuldigdes was – gekla dat hulle die slagoffers van verkragting en kinderpornografie was.
Albei kinders is daarna medies ondersoek en die verslae het daarop gedui dat hulle sedert ‘n jong ouderdom mishandel is.
Forensiese ondersoekers het op ‘n groot hoeveelheid materiaal beslag gelê by die eiendomme.
Lourens het op een van die beskuldigdes se huise kommentaar gelewer en gesê: “Dit het gelyk of dit nog nooit skoongemaak is nie en… het ‘n skerp urine-reuk gehad.
“Daar was baie min kos in die huis. Die inkomste wat die beskuldigde gesê het hy deur varkboerdery gemaak het, stem nie ooreen met die hoeveelheid diere op die eiendom nie.”
Twee van die vroue en een van die mans het hul koppe geskud toe Lourens se verklaring gelees is.
Carstens het gesê borgtog moet geweier word aangesien die agt deur die gemeenskap bedreig kan word.
Woensdag was die tweede dag van die aanhoor van die groep se borgtogaansoek. Die groep, tussen 26 en 61, is in verband met ‘n reeks klagtes wat met kinderpornografie verband hou, in hegtenis geneem.
- Volg Nuus24 op Twitter
- SAPA