Kinders gevind wat met naalde en kondome speel
2011-11-27 18:54
Johannesburg – Kinders by ‘n skool in Mpumalanga is gevind waar hulle met mediese spuitnaalde en kondome van die provinsiale gesondheidsdepartement gespeel het.
Kinders by die Gekombineerde Skool Louisville in Nkomazi het met die spuitnaalde gespeel na dit tesame met ongebruikte kondome naby die skool gestort is.
“Ons is in kennis gestel die kondome en die naalde is nie gebruik nie, maar ons glo steeds die kinders moet ‘n dokter besoek om seker te maak hulle word nie siek nie,” het die woordvoerder Dumisani Mlangeni van die provinsiale gesondheidsdepartement gesê.
Mlangeni het gesê die naalde en die kondome was promosiemateriaal.
Hy het gesê ‘n werknemer van die departement of die diensverskaffer, wat deur die departement aangestel is, het van die naalde en die kondome ontslae geraak.
“As ons die sondebok vind, sal die polisie in kennis gestel word, want dit is krimineel.”
– Volg Nuus24 op Twitter.
- African Eye