Kinderoppasser in Sasolburg verkrag
2012-02-19 17:02
Johannesburg – ‘n Man is in hegtenis geneem nadat hy na bewering ‘n vrou in Vaalpark, Sasolburg, verkrag het, het die Vrystaatse polisie gesê.
Die vrou was indiensgeneem om twee kinders op te pas toe die man sy hand oor haar mond sit en haar uit 'n bed gehaal het, het konst. Peter Kareli in ‘n verklaring gesê.
Die beweerde voorval het Saterdagoggend omstreeks 01:00 plaasgevind.
Daar word beweer dat die broer van die eienaar van die huis haar uit die bed gehaal het, het Kareli gesê.
“Die man het glo vir haar gesê sy mag nie skree nie en het haar na ‘n ander kamer geneem waar hy haar ‘n paar keer verkrag het.”
Die kinders het glo begin huil toe hulle sien dat die vrou nie meer in die kamer is nie. Hulle het na hul tante, wat in ‘n ander kamer geslaap het, gegaan.
Die tante het vir die vrou gesoek en die eienaar van die huis in kennis gestel dat sy nie die oppasser kan vind nie. Die eienaar was ten tyde van die voorval in Bloemfontein.
Daarna het die eienaar die polisie gebel.
Kareli sê die tante het toe ‘n geluid onder die man se bed gehoor. Die oppasser het halfkaal onder die bed gelê en gebewe.
Die polisie het opgedaag en die man in hegtenis geneem. Die vrou is na ‘n veilige plek geneem.
Die man sal Maandag in die Sasolburg-landdroshof verskyn.
Volg Nuus24 op Twitter
- SAPA