Kind verdrink in spruit wat met rioolvuil besoedel is
2010-07-07 10:36
Beeld
Senekal. – ’n Seun (5) het in onbehandelde rioolafval verdrink wat nog vrylik in die Sandspruit vloei ondanks ’n strafregtelike saak wat ná jare se rioolprobleme in Mei deur die DA teen die Setsoto-munisipaliteit aanhangig gemaak is.
Die erg besoedelde Sandspruit vloei in die Sandrivier wat, as dit genoeg reën, na die Allemanskraaldam tussen Winburg en Ventersburg lei.
Die Setsoto-munisipaliteit het Dinsdag nie geweet Katleho Hlaty- wayovan die Matwabeng-township het Maandag in die spruit verdrink nie.
Die plek waar Katleho verdrink het, is onder meer met kondome en menslike uitwerpsel besoedel.
’n Polisieduikspan van Welkom is ingeroep om na sy lyk te soek. Die span wou egter nie die vuil water binnegaan nie en het hake gebruik om die lyk op te spoor en uit te haal.
Waar hy verdrink het, is die spruit net sowat ’n meter diep.
Flip Strydom, DA-stadsraadlid, sê rioolafval is ’n groot probleem in die Setsoto-gebied – wat Clocolan, Marquard, Ficksburg en Senekal insluit.
Hy sê talle onvoltooide munisipale tenders het tot dié krisis gelei. Die groot rioolbehandelingsprojek van miljoene rande moes al sowat twee jaar gelede voltooi gewees het, maar staan al geruime tyd stil.
Volgens Strydom doen die munisipaliteit ook nie die nodige instandhoudingswerk nie. “Die munisipale amptenare... het nie die voertuie of toerusting om hul werk te doen nie,” sê hy.
Henk van der Walt, bedryfsbestuurder van die DA in die Thabo Mofutsanyana-distrik en inwoner van Senekal, het die saak namens die DA op 22 Mei by die Senekal-polisiekantoor aanhangig gemaak.
Hy sê ingevolge die Waterwet is onbehandelde rioolafval wat op-setlik of as gevolg van nalatigheid gestort word, ’n strafregtelike oortreding. Van der Walt sê ’n vergadering tussen raadslede en die Senekalse sakeforum is verlede week gehou om ’n oplossing vir die probleem te soek.
Die rioolafval vloei op verskeie plekke, insluitend die Senekalse gholfbaan.
Thabo Mokhethoa, bestuurder van die munisipaliteit se water-en-rioolafdeling, sê die munisipaliteit weet van die probleem.
Hy sê die raad het al met die departement van waterwese vergader om ’n 30 kW-pomp by die spruit aan te bring aangesien die huidige pomp te klein is. Die pomp is al bestel.
Kapt. Phumelo Dhlamini, ’n polisiewoordvoerder, sê ’n senior aanklaer van Bloemfontein ondersoek die saak teen die munisipaliteit. Hy het bevestig kenners gaan die water in die Sandspruitrivier binnekort kom toets.
- Volg Nuus24 op Twitter.
- Beeld