Keuse vir hoofregter ‘ietwat van ’n skok’
2011-08-17 07:02
Kaapstad - Pres. Jacob Zuma se benoeming van regter Mogoeng Mogoeng as hoofregter het Dinsdag politici en regslui skeef laat opkyk.
Die feit dat Zuma adjunkhoofregter Dikgang Moseneke weer eens oor die hoof gesien en ook nie toegegee het aan druk van onder meer die ANC-vroueliga om vir die eerste keer ’n vroulike hoofregter aan te wys nie, het eweneens verbasing uitgelok.
Prof. Pierre de Vos, grondwetkenner aan die Universiteit van Kaapstad, het Mogoeng as ’n “konserwatiewe regter” bestempel.
Hy het gesê gegewe die aantal uitnemende regters waaruit Zuma kon kies, is dit “ietwat van ’n skok” dat hy Mogoeng – wat in 2009 as regter van die konstitusionele hof aangewys is – benoem het.
Zuma het Dinsdag politieke partye en die Regterlike Dienskommissie oor sy benoeming van Mogoeng ingelig. Hulle het tot 24 Augustus om daarop te reageer.
Mogoeng het jare ondervinding in die regsberoep. Hy is in 1997 as regter in die Noordwes-hooggeregshof aangewys en het daar in 2002, ná twee jaar in die arbeidsappèlhof, regter-president geword.
“Hy het sy kundigheid en toegewyde belangstelling in die verandering van die regbank en die bevordering van toegang tot die regstelsel bewys deur nie net deel te wees van nie, maar ook programme te lei wat ontwerp is om doeltreffendheid en transformasie van howe te bevorder,” lui ’n verklaring deur die presidensie.
Die IVP se hoofsweep, mnr. Koos van der Merwe, het gesê hy is “verras” oor Zuma se keuse. “Regter Mogoeng is betreklik junior vergeleke met ander.”
Die DA-leier, Helen Zille, het gesê haar party sal Mogoeng se agtergrond en sy toewyding tot die onafhanklikheid van die regbank noukeurig nagaan.
Die VF+ se leier, dr. Pieter Mulder, het gesê dit is belangrik dat die nuwe hoofregter “onbevrees die onafhanklikheid van die regbank en konstitusionele hof beskerm”.
Die pos van hoofregter het op 14 Augustus vakant geword toe oudhoofregter Sandile Ngcobo se dienstermyn verstryk het.
– Volg Nuus24 op Twitter
- Die Burger