Kerke kap Zuma oor Malema
2010-04-06 07:48
Anesca Smith, Die Burger
Kaapstad - Die NG Kerk en Gereformeerde Kerke in Suid-Afrika (GKSA) het pres. Jacob Zuma gister regstreeks aangevat oor sy jakkalsdraaie om die ANC-jeugleier, Julius Malema, vas te vat oor sy “Skiet die Boer”-lied.
Prof. Piet Strauss, moderator van die NG Kerk, en dr. Kobus Gerber, algemene sekretaris, het na aanleiding van die moord op Eugène Terre’Blanche in ’n verklaring gesê: “Die land kan nie emosionele liedere en slagspreuke wat rassespanning verhoog, bekostig nie.
“Pres. Zuma se beroep om kalmte en wetsgehoorsaamheid word verswak deur sy skynbare onvermoë of weiering om Julius Malema hieroor vas te vat. Sy belofte by die onlangse ete saam met Afrikaner-kultuur- en kerkleiers om aandag aan dié saak te gee, het net mooi niks opgelewer nie.”
Die GKSA het by monde van ds. Cassie Aucamp en dr. Nico Malan in ’n verklaring gesê: “U huiwering om radikale individue en opruiende liedere in eie geledere te repudieer, lei tot die uitstuur van ’n dubbelsinnige boodskap na landsburgers met betrekking tot versoening, geweld en die oppergesag van die reg.
“U kan nie die noodsaaklike leiding neem vir nasiebou en vreedsame naasbestaan in Suid-Afrika en terselfdertyd swyg wanneer u ondersteuners opruiende uitsprake uiter en liedere soos ‘Skiet die Boer’ sing nie.”
Die NG Kerk vrees luidens sy verklaring dade, soos die “weersinwekkende moord” op Terre’Blanche, verhoog nie net spanning tussen Suid-Afrikaners nie, maar vergroot ook die kloof tussen verskillende radikale en minder radikale groepe.
Die GKSA het gesê die moord onderstreep hoe broos demokrasie in die land is. “Dié enkele gebeurtenis ontketen gemoedere en beklemtoon opnuut hoe nodig ons die Here se genade het om in vrede en wedersydse begrip saam te leef.”
In die lig van Romeine 12:18 het die GKSA ’n beroep op verantwoordelike en nugter optrede gedoen: “Moenie self wraak neem nie, geliefdes, maar laat dit oor aan die oordeel van God.”
Die Suid-Afrikaanse Raad van Kerke (SARK) het ’n beroep op volgelinge van die AWB-leier gedoen om hulle van wraak te weerhou.
“Moet dié ongelukkige gebeurtenis nie gebruik om die versoening wat ons land so desperaat benodig, te beduiwel nie,” het Eddie Makue, sekretaris-generaal van die SARK, gesê.
Makue het in sy kommentaar oor die Malema-lied ’n beroep op Suid-Afrikaners gedoen om hulle van opruiende taal te weerhou.
Die hoof van die Anglikaanse Kerk in Suider-Afrika en aartsbiskop van Kaapstad, dr. Thabo Makgoba, het sy skok uitgespreek oor die gebeure en meegevoel met die Terre’Blanche-familie betuig.
“Geen kind van God, ongeag wie hy is of wat sy mening mag wees, se lewe behoort op dié wyse te eindig nie.”
- Die Burger