Kerk verwoes in brand
2010-02-08 08:53
Neels Jackson
Johannesburg - ’n Elektriese fout het waarskynlik daartoe gelei dat die NG gemeente Koedoesrant se kerkgebou op Swartwater in Limpopo Sondagoggend afgebrand het.
Ds. Wimpie Jordt het gesê hulle het om 06:55 gister agtergekom die kerk brand.
Rook het by die kerk se dak uitgeborrel en teen halfagt was alles verby.
Die dak en alles in die kerkgebou is vernietig. Dit sal gesloop moet word, het Jordt gesê.
Volgens Jordt word die syfer van R7 miljoen se skade genoem, maar hy kon dié syfer nie bevestig nie.
Die gebou is verseker.
Jordt het gesê die gemeenskap aan die Botswana-grens is ’n hegte een wat droogtes en swaarkry ken.
Hulle glo Christus hou sy kerk in stand.
Met die puin wat nog agter hulle smeul, het die gemeente in die ou kerkgeboutjie wat as saal gebruik word, nagmaal gevier, het Jordt vertel.
Jordt het gesê daar was nietemin baie emosie want die gemeenskap het baie sentiment aan die gebou gehad.
Dis in 1962 kontant opgerig en die laaste lid van die boukommissie wat nog geleef het, oom Koos (Straat) Coetzee, is verlede week uit die einste gebou begrawe.
Die hele gemeenskap, van watter kerkverband ook al, het die NG gemeente Sondag ondersteun nadat hul gebou afgebrand het.
Oor dié steun wat hulle gekry het, het Jordt gister gesê: “Ons harte is vol daarvan.”
–Beeld