Kerk-rooftog: Priester aangehou, rowers geskiet
2010-09-27 10:37
Johannesburg - Die polisie het twee mans doodgeskiet toe hulle probeer het om ‘n kerk in Pinetown te beroof, het ‘n woordvoerder Maandag gesê.
Die polisie het Sondag ‘n wenk ontvang dat ‘n rooftog by die Rooms-Katolieke kerk in Pinetown beplan is, het lt. kol. Vincent Mdunge gesê.
Polisiebeamptes is na die kerk ontplooi.
“Hulle het drie verdagtes na die kerkgronde sien stap terwyl ‘n diens aan die gang was. ‘n Vierde verdagte het die motor waarmee hulle sou ontsnap het, bestuur,” het Mdunge gesê.
“Toe die kerkdiens om 18:00 klaar was en die gemeentelede die perseel verlaat het, het die verdagtes die priester na sy kantoor gevolg. Die priester het die kollektegeld by hom gehad. Hulle het gedink daar was R60 000 in die mandjie.”
Die vermeende rowers het ‘n vuurwapen op die priester gerig.
Die polisie het die verdagtes toe gekonfronteer, maar hulle het geweier om saam te werk, het Mdunge gesê.
Die mans het op die polisie geskiet en die beamptes het “sonder huiwering” teruggeskiet.
“Twee van die verdagtes is noodlottig gewond en ‘n derde het bytmerke op sy hand en gewrig gehad waar die polisiehonde hom beetgekry het. Die vierde verdagte het van die toneel gevlug en word steeds deur die polisie gesoek.”
Twee vuurwapens – ‘n 9mm-pistool en ‘n .3-rewolwer – is op die toneel gevind.
‘n Saak van gewapende roof met verswarende omstandighede word ondersoek.
‘n Geregtelike ondersoek na die dood van die twee mans wat deur die polisie geskiet is, sal ook geloods word, het Mdunge gesê.
- Volg Nuus24 op Twitter
- SAPA